DÍA MUNDIAL DO MEDIO AMBIENTE

Mañá, 5 de xuño, é o Día Mundial do Medio Ambiente. Este ano, o mundo unirase para combater a contaminación por plásticos dun só uso baixo o lema “Un planeta #sen contaminación por plásticos”. A campaña insta aos gobernos, a industria, as comunidades e as persoas a xuntarse para reducir a produción e o uso excesivo de plásticos desbotables que contaminan os nosos océanos, danan a vida mariña e ameazan a saúde humana.

Nós, na aula de natureza, estivemos falando da importancia deste día e lembrando que lixo hai que meter no contedor do plástico.

Despois lemos o conto “A historia do Rainbow Warrior” de Kalandraka.

En 1978 un barco coas cores do arco da vella comezou a sucar os mares e océanos do planeta para denunciar ante a humanidade a caza indiscriminada de baleas e focas, a contaminación provocada polos residuos tóxicos e radioactivos, as explotacións petrolíferas e de gas, o uso de redes mortíferas para especies mariñas indefensas… 
Algúns países foron sensibles a esas protestas e aprobaron leis que contribuíron a que o mundo fora máis habitable. 
Pasaron 21 anos dende que aquel primeiro Rainbow Warrior foi afundido no fondo das augas e convertido en arrecife artificial. Pero a súa replica actual, mantén a súa causa tan vixente como o primeiro día.

Tras escoitar esta preciosa historia, de cómo os guerreiros do arco da vella loitaron por defender o planeta e as súas especies da contaminación e das agresións medioambientais, cada neno debuxou a súa versión deste barco.