BO NADAL!

Onte celebramos a festa de Nadal cada aula por separado, xa que debido á pandemia non puidemos facelo todos xuntos.

Nenos e mestres pasámolo moi ben xogando, facendo manualidades, bailando, contando contos…

Tamén, como non, o Apalpador quixo facernos unha visita. Pero como el non podía vir xa que estaba moi atarefado construíndo os xoguetes de madeira para os nenos, mandou a súa muller a Apalpadora que recolleu as cartas dos nenos e agasalloulles con chocolates.

GRAZAS POLA TÚA VISITA E AGASALLOS! 

Agora chegan as vacacións de Nadal e dende o C.R.A de Ribadumia queremos desexarvos unhas Felices Festas e un Próspero Aninovo e que o 2021 veña cargado de saúde para todos.

Para terminar quero amosarvos dous vídeos preciosos que fixeron as mestras Olalla de Música e Malú de Educación Física e Informática para conmemorar estas datas tan entrañables e cheas de ilusión para os nenos.

SORTEO DE VERDURAS!

Algunhas das nosas leitugas xa medraron e están listas para a colleita, por iso estamos realizando o seu sorteo entre os nenos das diferentes aulas.

A nosa intención é que todos os nosos alumnos leven una verdura ou hortaliza. O curso pasado non puido ser así, xa que tivemos que confinarnos nas casas.

PROTECCIÓN CONTRA OS CARACOIS E LESMAS

Na aula de natureza estivemos partindo, en anacos pequenos, cascas de ovos para poñer ao redor das verduras do noso invernadoiro e así, tratar de evitar que os caracois e lesmas coman as súas follas. Para realizar esta tarefa, os nenos puxeron luvas para non pincharse con elas.

Ademais, deste xeito, tamén enriquecemos a terra con calcio e evitaremos que se apodrenten as nosas verduras.

ESPEREMOS QUE FUNCIONE!

AMENEIRO

 Trátase doutra árbore que podemos atopar na Ruta da Pedra e da Auga.

Ten un inimigo que é a agelástica. Trátase dun insecto que tanto de adulto como de larva aliméntase das follas do ameneiro. Os seus ovos son amarelos e as larvas de cor negro. Estas migran ao chan onde entérranse para transformarse nun escaravello de cor azul metálico.

CINERARIA

Os alumnos de Ribadumia B, estiveron plantando cinerarias no xardín.

Trátase dunha planta que ten flores, con cores moi vivos, semellantes ás margaridas.

Podedes ver máis fotos pinchando neste ENLACE.

AS ÁRBORES

Seguindo coa Ruta da Pedra e da Auga, empezamos a coñecer que árbores podemos atopar neste percorrido.

A primeira foi O CARBALLO. 

Como temos moitos no noso xardín de Leiro, saímos para ver como son as súas follas e o seu froito, se é de folla caduca ou perenne.... 

Despois, na aula de natureza, fixemos unha ficha coa que recordar todo o que descubrimos sobre esta árbore.

PENSAMENTOS

Seguimos enchendo de flores, de moitas cores, o noso xardín. Esta vez tocoulle aos alumnos de Leiro, que estiveron plantando pensamentos.

Tamén botaron cortiza de pino ao redor dalgunhas das plantas que xa tiñamos.

Podedes ver máis fotos dos nenos pinchando neste ENLACE.

REUTILIZANDO RODAS DE TRACTOR

Os nenos de Ribadumia A plantaron coles decorativas nunhas rodas de tractor, que reutilizamos como testos. Deste xeito reciclamos e reducimos a cantidade de lixo que tiramos.

Máis fotos AQUÍ.

VIOLAS

 Os alumnos de Ribadumia B, estiveron plantando violas no xardín.

Despois botaron ao redor das plantiñas cortiza de pino, que ademais de evitar que saian moitas herbas malas tamén vai servir para:

- Evitar que cada vez que reguemos, a auga se evapore con máis rapidez.

- Protexer as raíces contra o frío e a conxelación en inverno e mantelas máis frescas no verán.

Podedes ver máis fotos pinchando neste ENLACE.

PRÍMULAS

Hoxe, luns 16, os nenos da aula de Leiro plantaron prímulas no xardín.

Máis fotos neste ENLACE.

OS MUÍÑOS

Como na Ruta da auga e a pedra podemos atopar muíños, comezamos por coñecer como funcionaban estes artefactos que utilizaban a forza da auga como fonte de enerxía para moer cereais e producir fariña.

Primeiramente estivemos mirando os tipos de cereais que máis se utilizaban para moer (millo, trigo e centeo), e despois vimos o vídeo  de “O muíño do Martiño” para ver como era o seu funcionamento.

Despois, estivemos aprendendo os nomes das partes máis importantes e para que servía cada unha. 

CICLAMEN

 Comezamos a plantar no xardín, e os primeiros en facelo foron os alumnos de Sisán.

A planta que eliximos foi o ciclamen, e para que sexan máis vistosas escollemos variedade de cores como branco, vermello, rosa, fucsia…

Podedes ver máis fotos se pinchades AQUÍ.

A RUTA DA PEDRA E DA AUGA

Como o Concello de Ribadumia conta cun patrimonio histórico moi importante, dende a escola queremos que os nosos alumnos o coñezan e así valoren a riqueza e a importancia da zona onde viven. Por iso imos comezar un pequeno proxecto a través do que pretendemos que coñezan A RUTA DA PEDRA E DA AUGA.

Para percorrela, partiremos dun elfo que aparece nun caderno (editado polo Concello de Ribadumia)  que leva por título “Os camiños da auga”.

Na aula de Natureza xa presentamos a este elfo que vai servir de guía. Os nenos de cada aula, tiveron que poñerse de acordo para poñerlle un nome e elixir as cores da súa vestimenta.

                                                                                LOIS

                                                                 LEIRO             RIBADUMIA B

                                                                SISÁN              RIBADUMIA A  

A partir de agora,  a través deste percorrido, coñeceremos os seus muíños e as especies de animais, plantas e árbores que podemos atopar nesta ruta ao seu paso polo Concello de Ribadumia.