DÍA DA PAZ

 Hoxe, 30 de xaneiro, conmemoramos o día da Paz.

Con esta celebración, o que se aprende é evitar calquera forma de violencia e promover a tolerancia, a solidariedade, o respecto e que todos nos comprometamos a utilizar formas pacíficas para resolver os conflitos do día a día.

Na aula de natureza, os nenos estiveron dicindo algunhas accións coas que podemos conseguir a Paz: axudarnos uns a outros, non gritar nin pegar, ser amigos de todos os nosos compañeiros de clase…

Despois, estivemos lendo o conto “El ratón y la montaña”. Esta historia parte da iniciativa dun rato que, movido polo sentimento de culpabilidade, consigue mobilizar a todo o seu entorno, chegando incluso a implicar a unha montaña que é un símbolo da natureza. A pesar dos obstáculos cos que se atopa non se da por vencido, e acaba por solucionar o problema e transmitirnos o importante que é que todos colaboremos para obter resultados.

Na ficha que realizamos para lembrar este día, tamén coloreamos os personaxes deste conto, numerámolos tendo en conta o seu orden de aparición, debuxamos ao neno e aprendemos a facer un rato de forma fácil.

OUTRAS RECEITAS CON BRÓCOLI

Seguimos recibindo fotos dos nosos alumnos comendo o brócoli que lles tocou no sorteo das verduras que plantamos no noso invernadoiro.

Yolanda, a mamá de Lía de Lois, mandounos unha foto da súa filla coméndoo con ovo e patacas.

Lidia, a nai de Xulia de Ribadumia B, enviounos unha foto da súa nena comendo esta verdura con patacas e polo cocido. Ademais escribiunos que dixo que era o mellor brócoli do mundo.

Andrea, a mamá de Carmen Barcala de Ribadumia A, dinos que o fixeron o brócoli con patacas e ovos.

Para que saibamos como realizaron esta receita, aquí tede a Carmen en varios vídeos explicando o proceso.

ENCÁNTANOS VER A XULIA, LÍA E CARMEN COMENDO VERDURAS! 

GRAZAS POLAS FOTOS E VÍDEOS E POR ENSINARNOS AS VOSAS RECEITAS!

OS COGOMELOS

Na aula de natureza, estamos cun proxecto sobre os cogomelos.

A través del, estamos aprendendo: que máis nomes reciben, onde podemos atopalos, cales son velenosos e cales comestibles…

Algúns teñen nomes moi curiosos!

OVOS RECHEOS CON BRÓCOLI E ATÚN

María, a mamá de India de Sisán, mandounos a receita que fixeron co brócoli que lle tocou a súa filla.

“Ovos recheos con brócoli e atún”

Ingredientes:
4 ovos
1 cenoria
1 brócoli
1 lata de atún
Maionesa
Queixo cremoso (opcional)

Preparación:

Primeiro limparon e cortaron as verduras.

A continuación puxeron auga con sal nunha tarteira a ferver, e botaron as verduras, os ovos e a cenoria durante 15 minutos aproximadamente.

Cando estiveron cocidos retiraron os ovos quitáronlle a casca, e partíronnos pola metade separando as claras das xemas.
Despois mesturaron as verduras cocidas e brandiñas coas xemas, a cenoria e o atún.

Unha vez todo estivo esmagado e uniforme, botaron un pouco de maionesa e revolveron. Deste xeito, xa temos listo o recheo e só queda poñelo en cada metade dos ovos.

Na casa de India, botáronlle un pouco queixo cremoso e despois metéronnos uns minutos no forno. Pero dinos María, que tamén podedes poñelos na neveira e servir fríos adornados con olivas ou en ensalada.

QUE COCIÑEIRA ESTÁ FEITA INDIA!!

MOITAS GRAZAS POLA RECEITA!!

TEÑEN QUE ESTAR RIQUÍSIMOS ESTES OVOS RECHEOS!! 

TEMOS BRÓCOLI!

O brócoli xa está listo para que os nenos o leven as súas casas e preparen riquísimas receitas coas súas familias.

Estamos desexando ver eses deliciosos pratos!!

TALLER DE ARQUITECTURA

Este venres, 14 de xaneiro, recibimos a visita da arquitecta Elena Belgrano que é a coordinadora de Educohabitar.

Explicoulles aos nenos que os animais xa existían antes que nós, e por iso teñen moita experiencia construíndo. Os humanos aprendemos das súas técnicas de construción e usamos tamén a maioría dos seus materiais: os topos escavan, as termitas e as cegoñas apilan, as abellas modelan, as arañas fían e os paxaros tecen e cosen.

Despois con palitroques e conectores de silicona, convertéronse en arquitectos construíndo unha casa, un pozo...

Esta actividade permitiulles traballar en grupo ao ser todos parte activa da produción. Tamén descubriron que a través da colaboración pódense ir resolvendo os problemas que van xurdindo.

SORTEAMOS LEITUGAS!

Iniciamos este segundo trimestre do curso 2021-22, sorteando entre o noso alumnado as leitugas que plantamos no invernadoiro e xa están listas para a colleita.