BO VERÁN A TODOS!

Dende a aula de natureza desexamos que pasedes unhas boas vacacións de verán.

Aos nosos alumnos que inicial a Educación Primaria, queremos mandarlles unha forte aperta e desexarlles que todo lles vaia moi ben nesta nova etapa que inician. Moitos bicooos!

Aos demais alumnos… vémonos en setembro! 

2º SORTEO DAS HORTALIZAS DO NOSO INVERNADOIRO

Todos os alumnos do C.R.A de Ribadumia xa levaron, para as súas casas, unha hortaliza do noso invernadoiro.

Como o curso xa está rematando, estamos facendo un segundo sorteo das que van medrando.
Leitugas, cebolas, acelgas, patacas, cabaciñas…

ROLO VEXETAL PARA MERENDAR

Esta semana, os nenos das distintas aulas, están preparando un rolo vexetal coas leitugas do noso invernadoiro.

Ingredientes que utilizamos:

Rebandas de queixo e xamón cocido, que os nenos trouxeron das casas

Base de biscoito

Atún

Queixo de untar

Unha leituga

Realización:

Lavamos as follas de leituga e partímolas en anacos moi pequenos

Estendemos o queixo de untar sobre a base de biscoito

Botamos a leituga e, a continuación o atún

Cada neno pon enriba a súa rebanda de queixo e xamón cocido

Enrolamos todo e… LISTO PARA MERENDAR

Despois, na aula de natureza, escribimos o nome da receita e os ingredientes que utilizamos.

SEMENTES DE CABAZA

Sandra, a mamá de Rodrigo de Ribadumia B, trouxo sementes de cabaza francesa e comentounos, que era moi brandiña e boa para baleirar e tallar.

Moitas grazas Sandra!

Rodrigo e os seus compañeiros estiveron plantándoas no xardín… 

Máis fotos neste ENLACE.

Desexamos que medren moitas para decoralas para a festa do Magosto-Samaín do vindeiro curso, facer algunha receita con elas, sacarlle as sementes para que os nenos as planten nas súas casas …

CASIÑAS PARA OS PAXAROS

Voz Natura regalounos casiñas de madeira para paxaros e nós, coa axuda da mestra Ángeles, estivemos poñéndoas polas árbores do noso xardín.

Despois xogamos cos nenos a atopalas…

XA TEMOS MÁIS COLLEITA

Xa medraron algunhas remolachas e cabaciñas e, como coas demais hortalizas, estamos realizando o seu sorteo…

BEGONIAS

O noso xardín xa empeza a ter cor, con todas as flores que estamos plantando dende que comezou a primavera.

Os nenos de Ribadumia B tamén colaboraron, nesta tarefa de deixalo fermoso, poñendo begonias.

Máis fotos pinchando AQUÍ.

COGOMBROS PARA O INVERNADOIRO

Como o curso 2013-14 a colleita de cogombros foi moi grande, decidimos plantalos de novo. 

Esta vez, foron os alumnos de Leiro os encargados de facelo…

Podedes ver máis fotos pinchando neste ENLACE.

PLANTAMOS ACELGAS

Os nenos da aula de Ribadumia A, estiveron plantando acelgas no invernadoiro…

Este curso tivemos unha boa colleita, xa que son poucos os alumnos que faltan por levar algunha verdura do noso invernadoiro…

Esperamos que, antes de que rematemos, vaian medrando as que plantamos para que poidan levar outra máis.

CONCURSO ESCOLAR SOBRE O MEDIO AMBIENTE

O 2015, trae de novo a 5ª convocatoria do Concurso Escolar que organiza AMEI (Asociación Mundial de Educadores Infantiles) co patrocinio de produtos UHU.

Nós, xa levamos dous cursos participando. No 2012-13 gañamos o segundo premio e no 2013-14 quedamos finalistas.

Neste 2014-15 imos a intentalo de novo presentando un vídeo co que, a través de imaxes e as voces dos alumnos comentándoas, pretendemos ensinar todas as actividades que realizamos para coidar o medio ambiente.

Temos que dar as grazas a Rosana, a mestra de música, que colaborou connosco na elaboración do video.